Heoi anō, nō tōku piringa tuatahi atu ki tōku 'māmā mexicana', a Claudia, me tana tamāhine hoki a Claudia, i rongo ai au i te aroha nui ki a rātou. Na, ka tae atu mātou ki te whare o ōku kaumātua mexicanos a Ema rāua ko Manuel. Ka kite kē i a rāua e pōhiri mai ana ki a māua ko Moana. Me tā māua ko Moana mīharo hoki i runga i te ātaahua me te nui hoki o te whare, ka mutu te ātaahua hoki o te wairua i waenga i te whānau rā.
Ka tūtaki atu māua ki ō māua kaumātua, ā, mutu ana tērā, i whakaritea e tō māua kuia tētahi kai o te pō. Me te reka hoki! Ki a au nei, koira te tino kai kua kainga e au i runga i tēnei haerenga katoa! Me te mea hoki, ko te pō tuatahi noa iho.
Ka takatū mai ko te Rātahi, ā, ka ārahi atu a Abuelo i a māua ko Moana ki tō māua rā tuatahi i te kura. No konā tūtaki ai mātou ki tētahi o ngā wāhine o te kura, me tāna whakarite mai i tētahi paku whakamātautau mā mātou. Mutu ana tērā ka wāwāhi i a mātou ngā ākonga me ngā kaiako ki ngā karaehe rere kē mo te taumata e tika ana mo te pakari o te reo Paniora. Ā, ka timata ngā mahi o te rā.
No muri mai i tērā, ka hoake mātou ki te ako i te kanikani salsa. Ko Roberto te kaiārahi i taua kaupapa me te whakamīharo o ōna pūkenga ki te kanikani me te whakaako hoki! Ahakoa te wera o te rā, koina kē te karaehe mutunga kē mai o te pai!
I te mutunga kē mai o te rā, nōku anō te maringanui taioreore te piri atu ki tēnei whānau ōku i Oaxaca, i runga anō i tō rātou aroha nui ki a rātou anō. He āhuatanga e pai ai taku mahara ki taku nohoanga i te kāinga i te taha i ōku kaumātua i Rotorua, me te koa hoki o te ngākau te kite atu, me kī, te rongo atu.
He kaha nō rātou te tino manaaki mai i a au, ahakoa kōrero mai, ahakoa awhi mai, ahakoa whāngai mai, ā, me kī, he tino āhuatanga tērā e ngākaunui ana au. I runga anō i te mea ka tino whakamāmā rātou i tēnei haerenga, e kore ai e nui te mokemoke atu ki te kāinga, ka mutu ki tōku whānau ake i te kāinga.
Na Kiriwaitingi
Kiaora Kiriwaitingi, nō Te Aho mātou e mihi atu ana ki a koe. He rawe mā mātou kia pānui i ōu tuhinga, engari, he pātai tā mātou: Ka taea e koutou hoki te tango whakaahua?
ReplyDeleteNgā mihi Kiriwaitingi mō ou kōrero miharo mō tō whānau mehikano. Tangi ana te ngākau me te harikoa kei to taha a Moana i raro hoki i ngā manaakitanga o tēnei whānau aroha.
ReplyDeleteI a koutou e akoako ana i te Salsa kei te kainga nei e whakaheke werawera ana ngā rohe katoa o Aotearoa i a rātou kapa mō te Matatini. Taku waimarie kei te kainga au ki te matakitaki i te whakataetae mai i taku pouaka whakaata me taku turu ‘tama māngere’.
Heoi, he pehea te wera o ngā rā me ngā pō i kona? Kei te heke tonu te wera o Tamanui te rā ki konei.
Na reira,
Adios amigos! kia kaha koutou ki te tiaki i a koutou me te ako.
PS- Kei te tatari mō ngā whakaahua.
Whaea Moana